Ish-ministri i Brendshëm, Fatmir Xhafaj, me anë të një postimi në rrjetet sociale ka falenderuar të gjithë ata që e kanë votuar në zgjedhjet e 25 prillit. Fatmir Xhafaj theu herësin Partisë Socialiste duke siguruar kështu një mandat në Kuvednin e Shqipërisë edhe pse në lista ishte i pozicionuar në vendin e 23. Xhafaj ka falenderuar të gjithë ekipin e tij që i dhanë kurajo dhe mbështetje për të ecur përpara dhe për ta çuar këtë betejë deri në fund. Ai nuk ka lënë pa falenderuar edhe votuesit të cilët sipas tij e respektuan me çdo votë që i dhanë.
Postimi i plotë:
Shifrat tashmë publike konfirmojnë se e kam kaluar pragun minimal për të qënë deputet në legjislaturën e ardhshme të Kuvendit të Shqipërisë. Së bashku me ekipin e fushatës jemi duke monitoruar përfundimin e procesit të numërimit për të respektuar çdo votë në kutitë e votimit.
MIRËNJOHJE! Kjo është fjala ime e parë në këto momente. Socialistëve që më dhanë kurajo dhe forcë ta çoj deri në fund këtë betejë! Të gjithë votuesve të qarkut që më vlerësuan për çfarë kam bërë në politikë, për çfarë unë jam dhe për çfarë ata besojnë se mund të vazhdoj të bëj.
Ekipit të jashtëzakonshëm që punoi intensivisht me mua gjatë këtyre muajve me shpresën e madhe se do ja dilnim. Dhe ja dolëm të bënim një fushatë tejet modeste në shpenzime, por të pasur në besim, në kurajo dhe në energji. Familjes sime të mrekullueshme që ishte pjesë e kësaj beteje dhe miqve tanë të shumtë që si përherë ndër vite u gjendën pranë nesh dhe na mbështetën me zemër në rrugëtimin tonë.
Në pamundësi për t’ju takuar dhe përshëndetur të gjithëve në këto momente dhe me dëshirën për tu parë e përqafuar së shpejti ju them: Faleminderit! Mirënjohje pafund!
