Kopshtet dhe çerdhet në Shqipëri do të hapen nga data 1 qershor.
Vendimin zyrtar e dha ministrja e Shëndetësisë, Ogerta Manastirliu, në një njoftim për mediat por edhe në rrjetin e saj social Facebook.
“Strategjia e rihapjes do të vijojë sipas fazave që komiteti teknik i ekspertëve ka miratuar.
Do të vijojmë me hapjen e çerdheve dhe kopshteve nga data 1 qershor, protokolli i të cilave është miratuar dhe është shpërndarë për t’u parapërgatitur për këtë datë.
Vlerësojmë që ky protokoll por edhe të gjithë protokollet e sigurisë duhet të zbatohen rreptësisht, pasi janë baza për ruajtjen e shëndetit të popullatës”, tha ministrja gjatë mbledhjes së Komitetit Teknik të Ekspertëve.
Sipas saj, faza e dytë e rihapjes do të vijojë edhe me sezonin turistik, me protokolle sigurie në funksion të mbrojtjes dhe vetëmbrojtjes së qytetarëve, për të kufizuar përhapjen e COVID-19.
“Nuk duhet të harrojmë që ky virus vijon të qarkullojë dhe ne duhet t’i përgjigjemi me të gjitha strukturat në gatishmëri. Kemi hyrë në javën e 12 të epidemisë me mbi 1 mijë të prekur.
Tashmë edhe puna bëhet më e vështirë për të gjurmuar kontaktet, ndaj duhet të intensifikohet puna nga strukturat tona të terrenit“, tha Manastirliu.
Por komenti i një qytetari ka marrë reagimin e shumë komentuesve.
“Normale që do hapen në 1 qershor, se do bëjnë foto me dron këta të gjithë kalamajve që të dalë video sa më bukur”, ka komentuar qytetari.
Por pavarësisht komentit, situata në Shqipëri vazhdon të mbetet delikate. Në 24 orët e fundit u evidentuan 25 raste të reja me koronavirus.
Kjo tregon edhe sesa të kujdeshëm duhet të jemi.
Edhe drejtuesja e Departamentit të Sëmundjeve Infektive në ISHP dr. Silva Bino kërkoi rritje të ndërgjegjësimit edhe të të rinjve.
“Rritja e numrit të rasteve sidomos në Tiranë tregon se sa të kujdesshëm duhet të jemi.
Është koha që të rinjtë të jenë të përgjegjshëm, që e gjithë popullata të jetë e përgjegjshme në mënyrë që të ruajmë distancën dhe rregullat e higjienës”, tha Bino.
Komiteti Teknik i Ekspertëve do të vijojë vlerësimin mbi baza ditore dhe 14 ditore të situatës epidemiologjike të COVID-19 për vendimet e mëtejshme.
https://www.facebook.com/OgertaManastirliu/videos/364438661195531/
