Zgjatja e pandemisë së Covid-19 dhe ndikimi i saj në uljen e konsumit të popullatës përbën një rrezik potencial për rritjen e papunësisë në normën më të lartë të 10 viteve të fundit.
Në vende të ndryshme të botës ekonomia është kthyer tashmë në shqetësimin më të madh teska po ndërmerren masa të ndryshme për të zbehur sa më shumë pasojat që ajo ka shkaktuar.
Ndonëse vendi ynë nuk u godit shumë nga koronavirusi, ekonomia ka pësuar goxha dëmtime.
Mbrëmjen e sotme e ftuar në “Zonë e lirë”, ministrja e Financave Anila Denaj bëri me dije se deri tani kanë humbur punën rreth 57 mijë shqiptarë dhe deri në fund kjo shifër mund të shkojë në 60 mijë.
Sipas saj, kjo shifër nuk është e qëndrueshme se aty përfshihen edhe personat që do rikthehen në punë pas hapjes së aktivitetit.
Sipas llogaritjeve tona rezulton se deri tani pët shkak të pandemisë kanë humbur punën 57 mijë persona dhe sipas llogaritjeve tona deri në fund të muajit mund të shkojë diku tek 6p mijë. Megjithatë, ky nuk mund të shihet si një numër i qëndrueshëm, sepse ka nga ato biznese që janë mbyllur përkohësisht.
Së fundmi, në një studim të Bankës së Shqipërisë, mbi skenarët e mundshëm të goditjeve të krizës së pandemisë, nëse kërkesa e brendshme do të reduktohet me 10%, shkalla e papunësisë do të shkonte 18.6%, duke rritur numrin e të papunëve me mbi 100 mijë persona.
Aktualisht norma e papunësisë në Shqipëri është 11.2 %, ndër më të ulëtat në dekadën e fundit, por sipas të dhënave zyrtare, në dy muajt e pandemisë numri i të papunëve që kanë dalë skema e sigurimeve shoqërore ka arritur në 61 mijë individë.
Sipas studimit të bankës qendrore, sektorët që do të gjenerojnë më shumë humbje janë bujqësia, industria përpunuese dhe pasuritë e paluajtshme.
