Ministria e Mbrojtjes ka bërë me dije se gjatë 24 orëve të fundit në vend janë regjistruar 20 vatra zjarri, prej të cilave 3 mbeten ende aktive dhe një tjetër nën monitorim.
Zjarret janë evidentuar në zona të ndryshme, përfshirë bashkitë Dibër, Bulqizë, Mallakastër, Fier, Kavajë, Vorë, Vau i Dejës, Shkodër, Malësi e Madhe, Has, Krujë, Vlorë, Selenicë, Gjirokastër dhe Përmet.
Në përpjekjet për fikjen e zjarreve janë angazhuar 29 automjete zjarrfikëse dhe 346 efektivë, ndërkohë që Forcat e Armatosura kanë kontribuar me 130 persona në terren.
Vatrat aktive aktualisht ndodhen në:
• Bulqizë, në zonën “Mali i Peladhisë” (njësia administrative Zerqan),
• Vau i Dejës, në “Qafa e Lacit”, ku zjarri ka përfshirë rreth 5 hektarë me lis dhe shkurre,
• Gjirokastër, në zonën “Grohot”, pranë vendit të grumbullimit të mbeturinave, ku një grup zjarrfikësish po punon për shuarjen e flakëve.
Një vatër tjetër po mbahet nën vëzhgim në “Liqenin e Luleve”, pjesë e Parkut Kombëtar Lurë në Dibër, ku zjarri është i fikur por ka ende pak tym.
Për shkak të zjarreve, janë djegur mbi 150 hektarë me bimësi të ndryshme dhe më shumë se 1,000 rrënjë ullinj. Përveç vatrave në natyrë, raportohet edhe për dëme materiale nga zjarri i një banese në lagjen “15 Tetori” në Fier dhe një autobus në aksin Kardhiq-Delvinë, pranë tunelit të Skërficës në Gjirokastër.
Sipas parashikimeve të Institutit të Gjeoshkencave, sot priten reshje të dobëta në Kukës dhe Elbasan, si dhe reshje të lokalizuara në qarqet Shkodër, Dibër, Tiranë, Berat, Korçë dhe Gjirokastër.
Sa i përket rrezikut nga zjarret në pyje, ai vlerësohet “I LARTË” në qarqet Lezhë, Fier, Berat dhe Gjirokastër, ndërsa në qarqet e tjera niveli i rrezikut është “I MODERUAR”.
Strukturat e Mbrojtjes Civile janë mobilizuar dhe të gatshme për të ndihmuar komunitetin në rast nevoje. Ministria apelon tek qytetarët të tregojnë kujdes, të shmangin ndezjen e zjarreve në ambiente të hapura dhe të raportojnë menjëherë pranë shërbimeve zjarrfikëse çdo vatër të re zjarri që konstatojnë.
