Me mbërritjen e COVID-19 në vendin tonë, qeveria u ka bërë thirrje të moshuarve që të qëndrojnë në shtëpi, nisur nga ekspozimi që shfaqin ata ndaj rrezikut, teksa u ka premtuar se pensioni do u shpërndahet në shtëpi.
Disa ditë më parë, gjatë mbledhjes që zhvilloi Rama me ministrat, Anila Denaj, ministre e Financave, deklaroi se javën e parë të prillit të gjithë pensionistët do kenë marrë pensionin pasi grupet e punës janë duke punuar.
Së fundmi, Ministria e Financave dhe Ekonomisë bën me dije se po bashkëpunon me Shoqatën e Bankave për shpërndarjen e pensioneve për ata që nuk mund ta tërheqin dot në bankë.
Përmes një njoftimi për mediat ka lajmëruar se me shqetësimin e krijuar ditët e fundit për pamundësinë e daljes së pensionistëve për të tërhequr pensionin pranë këtyre bankave, MFE është dakortësuar me Shoqatën e Bankave, që këto të fundit të gjejnë mundësinë për t’ua dërguar në shtëpi pensionin atyre që nuk shkojnë dot në bankë.
Shërbimi do të kryhet nga strukturat e bankave dhe pa kosto shtesë për pensionistët.
Më herët ditën e sotme Rama përforcoi masat pasi vendosi që gjatë 24 orëve të lejohet vetëm një person të dalë nga shtëpia dhe leja do të merret online nëpërmjet një aplikacioni, ose me telefon.
Platforma për aplikimin, që do të jetë portal qeveritar e-Albania, u prezantua pak më pare duke shtuar në portal shërbimin e ri “leje për dalje”, ku mund të bëhet aplikimi dhe konfirmimi merret menjëherë me e-mail apo sms.
Sot ka shkuar në 186 numri i të prekurve nga COVID-19 në vendin tonë pasi gjatë orëve të fundit janë testuar 102 persona, 12 prej të cilëve kanë rezultuar pozitiv, ndërsa në total janë kryer 1,246 teste.
