Ministrat e Jashtëm të BE-së do të diskutojnë sot në Luksemburg, për mundësinë e fillimit të negociatave me Shqipërinë dhe Maqedoninë e Veriut.
‘Deutsche Welle’ shkruan se diskutimi nuk pritet të jetë i gjatë, pasi Francë ka paralajmëruar me veto.
Ky shtet është i bindur, se reformat e Shqipërisë dhe Maqedonisë së Veriut nuk janë të mjaftueshme.
Drejtuesi i zyrës së Berlinit për Këshillin Europian për Marrëdhënie e Jashtme, Josef Janning ka kuptuar shqetësimin e Francës.
Sipas tij, francezët kanë qenë gjithmonë të shqetësuar, se shtimi i anëtarëve do të dëmtonte unionin.
Më tej Janning shton, se për Maqedoninë e Veriut dhe Shqipërinë, nuk ka rrugë tjetër përveç BE-së.
Eksperti gjerman mendon se nëse nuk ka një perspektivë të besueshme anëtarësimi, për këto vende bëhet shumë e vështirë, që t’i afrohen BE-së.
“Duhet parë edhe ana tjetër, nëse nuk ka një qëllim, një perspektivë të besueshme anëtarësimi, atëherë për aktorët politikë aty bëhet e vështirë, për të mos thënë se bëhet shumë e vështirë t’i qëndrojnë kursit për t’i afruar vendet e tyre në mënyrë konsekuente në drejtim të BE” , tha Janning.
Për Janning çelja e negociatave me këto dy vende, do të thotë një hap më shumë në drejtimin e sigurisë.
Mirëpo përveç Francës, edhe Holanda është një vend shumë spektik, i cili është gati t’i thotë ‘po’ Maqedonisë së Veriut, por nuk ndan të njëjtin qëndrim për Shqipërinë. Listës së shteteve skeptike i shtohet edhe Danimarka.
Përtej shteteve skeptike, ekziston edhe një frymë pozitive.
Gjermania nëpërmjet një vendimi unanim të Bundestagut, ka pranuar çeljen e negociatave me Shqipërinë, por duke vendosur dy kushte imediate dhe më pas 7 të tjerë.
Kryediplomati gjerman, Michael Roth, ka përkrahur gjithmonë negociatat.
Edhe në një intervistë të mëparshme, ai theksoi se Këshilli Europian ka nevojë për unanimitet.
Ndër të tjera ministri gjerman ka vlerësuar edhe reformat e të dyja vendeve, në fushën e sundimit të ligjit.
Megjithatë duhet parë, se sa do t’i dëgjojnë ministrant e tjerë të jashtëm thirrjet e Roth.
