Ministeriali i NATO-s mes ministrave të Mbrojtjes së vendeve anëtare është mbledhur sot online për shkak të kushteve në të cilat ndodhemi nga Covid-19.
Ministrja e Mbrojtjes Olta Xhaçka ka theksuar në takim se Covid-19 është një kërcënim dhe sfidë serioze për sigurinë e Aleancës, por në këtë situatë Aleanca duhet të tregojë unitet politik dhe solidaritet, e cila mund të arrihet pasi Aleanca ka aftësitë, burimet dhe forcat për tu bashkuar kundër kësaj pandemie.
Sakaq, Xhaçka ka kërkuar ndihmë përmes Qendrës Koordinuese Euro-Atlantike për reagimin ndaj fatkeqësive, si instrumenti i duhur për përballimin e situatës, e cila gjeti të papërgatitur dhe vendet me ekonomi më të madhe se Shqipëria.
“Ne shprehim solidaritet me të gjithë aleatët për humbjet në njerëz si rezultat i pandemisë. Mirënjohje për “ushtrinë e bardhë” të angazhuar në vijën e parë kundër armikut të padukshëm. Kjo pandemi gjeti të papërgatitur edhe vendet me ekonomi më të mëdha se Shqipëria. Ne jemi krenarë për kontributin e jashtëzakonshëm të Forcave të Armatosura. Ekspertiza dhe disiplina e FA kanë ndihmuar në përballimin e pandemisë. Mesazhi që Aleanca duhet të tregojë tani është ai i unitetit politik dhe solidaritet. Është koha për të reflektuar se çfarë duhet bërë më mire. Të rigjenerojmë diplomacinë publike kundër fushatës dezinformuese dhe lajmeve të rreme. Me solidaritet do ia dalim të përballojmë sfidat e ashpra, pasojë e pandemisë”, tha ajo.
Nga ana tjetër, Sekretari i Përgjithshëm Jens Stoltenberg tha se NATO po rrit përpjekjet kundër koronavirusit ndërsa i duhet të përgatitet edhe për të ardhmen e Aleancës.
Me anë të një statusi në Twitter, Stoltenberg siguroi se NATO i është përgjigjur situatës emergjente dhe thirrjeve për ndihmë me 100 misione humanitare që përfshijnë rikonstruktimin e 25 fushave në spitale, 25 mijë shtretërve spitalorë dhe 4 mijë profesionistë mjekësorë.
“Forcat ushtarake aleate kanë kryer mbi 100 misione furnizimi, kanë lehtësuar ndërtimin e 25 spitaleve në terren, kanë shtuar mbi 25,000 shtretër trajtimi dhe kanë dërguar mbi 4,000 profesionistë mjekësorë”, tha Stoltenberg teksa foli për përgjigjen e NATO ndaj krizës së Covid-19.
#NATO responds to #COVID19. Allied military forces have flown +100 supply missions, facilitated construction of 25 field hospitals, added +25,000 treatment beds & deployed +4,000 medical professionals. #StrongerTogether pic.twitter.com/ycwZpcBnvQ
— Jens Stoltenberg (@jensstoltenberg) April 15, 2020
