Në zgjedhjet e 25 prillit minatorët dhe punëtorët e Dibrës do të përfaqësohen nga Elton Debreshi i cili kandidon si deputet i pavarur. Debreshi është prej vitesh minator dhe ka qenë në krye të betejës sindikale që minatorët e Bulqizës kanë nisur prej thuajse dy vitesh.
I ftuar në një intervistë në Ora News me gazetaren Beti Njuma, ai ka treguar edhe arsyet që e kanë shtyrë të kandidojë
“Nuk ishte mendimi im, por ishte mendimi i shumë qytetarëve, minatorëve dhe ish-minatorëve. Na e kanë dhënë këtë ide që të hidhja kandidaturën, sepse është një bllokadë shumë e madhe e politikës që nuk po e çan kokën fare për minatorët dhe punëtorët në të gjithë Shqipërinë. Në Bulqizë kemi 30 vite me premtime dhe nuk po shohim gjë me sy. Boll premtime ka marrë prindi im, gjyshi im dhe sot vazhdoj të marr premtime edhe unë.”
Duke iu përgjigjur pyetjes së gazetares Beti Njuma nëse i kanë ardhur oferta nga parti të tjera politike, ai ka thënë se as nuk shitet as nuk blihet. Për të nuk ka vlerë thesi me para, por miratimi i Statusit të Minatorit.
“Në asnjë mënyrë nuk shitem e as do blihem. Nëse unë shitem, kam shitur prindin tim, djersën e tij që më ka rritur me punën në atë minierë të zezë. E nësë më ofrojnë para e gjithçka tjetër, unë do të zgjedhë Statusin e Minatorit dhe kështu zgjidh hallin e komunitetit dhe e të gjithë minatorëve të Shqipërisë. Thesin ta mbajnë vetë, të bëjnë ç’të duan, të vjedhin vota e të bllokojnë karta!”, ka thënë Debreshi.
Në 20 janar Sindikata e Minatorëve të Bashkuar të Bulqizës njoftoi kandidimin e Elton Debreshit si deputet i pavarur në qarkun e Dibrës. Nëse fiton zgjedhjet, do të jetë hera e parë që një punëtor hyn në parlamentin shqiptar dhe përfaqëson klasën e tij.
