Kryeministri Rama shpesh herë ka bërë bujë me faturat e kripura që paguhen për fluturimet e tij jashtë vendit. Kreu i Grupit Parlamentar të PD-së, njëkohësisht nënkryetari i kësaj partie, Gazment Bardhi, i është drejtuar Drejtorisë së Shërbimeve Qeveritare me një shkresë për informacion mbi udhëtimet me charter të Kryeministrit Rama që nga viti 2013, kur ka ardhur në pushtet e deri më 1 mars 2024.
Në shkresë kërkohet informacion për kostot e secilit prej këtyre udhëtimeve dhe kostot totale për kohën që Rama ka qëndruar në qeveri.
Kujtojmë se kryeministri Rama udhëton gjithmonë me Air Albania dhe për këtë, Bardhi ka kërkuar një kopje të marrëveshjes që qeveria shqiptare ka nënshkruar me këtë kompani fluturimi.
“Sipas ligjit institucionet e kanë detyrim që të informojnë deputetët për të dhënat e kërkuara brenda 15 ditësh. Kujtojmë këtu që në media dhe nga opozita ka patur akuza se vetëm për 137 fluturime me charter, Kryeministri ka shpenzuar rreth 22 milion euro, edhe pse ai është mbrojtur duke argumentuar që avioni charter i është vënë në dispozicion për promovim nga kompania bazuar në një marrëveshje”, thuhet në shkresë.
