Kryeministri Edi Rama, ishte sot në konferencë për mediat bashkë me kryeministrin e Kosovës, Avdullah Hoti, pas mbledhjes së dy qeverive në Tiranë.
Në konferencë, Rama u pyet nga gazetarët për të komentuar deklaratat e Presidentit Meta, se Shqipëria po humb para në Arbitrazh, nga gjyqet e humbura me kompani të ndryshme.
Rama nuk e pranoi për asnjë moment dështimin e Qeverisë së tij, dhe mohoi se Shqipëria ka humbur gjyqe në Arbitrazh, ndërsa iu vërsul gazetarëve.
“Po ju gazetarët çfarë bëni, pse nuk shikoni a është e vërtetë kjo? Në emër të fakteve, por kjo nuk është për autorin e akuzës, por për ju, ka disa kohë që është ngulur në opinion ideja që ne kemi humbur arbitrazhe. Ka disa kohë. Madje një pjesë e njerëzve mendojnë se ne kemi paguar edhe paratë e humbjeve. Po ju gazetarët cfarë bëni, pse nuk shikoni a është e vërtetë kjo? Deri më sot që flasim, deri përpara kësaj mbledhjeje të paktë, nuk kemi ne asnjë proces në Arbitrazh të përfunduar, ku ne të kemi humbur. Thjesht nuk kemi. Kemi skuadra të përbashkëta të Avokaturës së Shtetit, që punojnë për t’i zbrampsur këto vendime, që janë të natyrës paraprake.
Mirë ata që e kanë për të detyrë ndaj popullit që mos t’ia kërcasin kokoshkës, por ju duhet të bëni kërkime. Janë gënjeshtrat më të mëdha. Kemi fituar procese në Arbitrazhe, por nuk kemi humbur deri më tani as edhe një. Vazhdojnë përpjekjet në rrugë legale për t’i zmbrapsur. Nuk duhen bërë komente në Arbitrazh, sepse cdo koment konsiderohet shkelje e procesit zgjedhor. Llogariteni vetë autorin me këtë fakt dhe imagjinojeni se sa shumë e ka mendjen te Shqipëria”, deklaroi Rama.
Por, e vërteta është krejt ndryshe. Të paktën dy raste, janë treguar nga Arbitrazhi se Shqipëria duhet të paguajë për papërgjegjshmëri të qeveritarëve. Vetëm ndaj biznesmenit italian Francesco Beçheti, Shqipëria duhet t’i paguajë mbi 100 milionë euro, nga anulimi i konçesionit për hidrocentralin e Kalivaçit, si edhe për mbylljen e televizionit Agon.
Nga ana tjetër, vetëm pak kohë më parë, Gjykata Ndërkombëtare e Arbitrazhit vendosi një faturë prej 44 milionë dollarësh në formë dëmshpërblimi për llogari të kompanive Copri dhe Aktor, të cilat u kontraktuan në vitin 2012 nga Ministria e Infrastrukturës dhe Energjisë, për ndërtimin e autostradës Tiranë-Elbasan, por më vonë kontrata me to u prish.
/GazetaReforma.com/
