Në zemër të Manhattanit, komuniteti shqiptar në SHBA u mblodh sërish për paradën e përvitshme në New York, e organizuar nga “Albanian Roots”.
Ngjarja nisi paraditen e së dielës nga Central Park West & 81st Street dhe vijoi me një festë kulturore në W 72nd Street, ku nuk munguan muzika, vallet, kostumet tradicionale dhe kuzhina shqiptare.
Përpara paradës, kryebashkiaku i New York-ut, Eric Adams, mirëpriti në rezidencën e tij përfaqësues të komunitetit shqiptar, duke shprehur vlerësimin për kontributin e tyre në jetën qytetare të qytetit dhe duke nderuar trashëgiminë shqiptare.
Kjo paradë është kthyer në një moment identitar të rëndësishëm për diasporën shqiptare në Shtetet e Bashkuara dhe një platformë për promovimin e kulturës shqiptare përpara botës.
Ajo mbështetet nga figura të njohura të komunitetit, përfshirë edhe ish-këshilltarin Mark Gjonaj, dhe përcjell një mesazh të fortë për unitetin dhe krenarinë kombëtare: “Rrënjët na mbajnë tokës, por bashkimi na çon larg” .
