Mianmari shpall gjendjen e jashtëzakonshme pas tërmetit shkatërrues të magnitudës 7.7, i cili goditi vendin mëngjesin e sotëm.
Epiqendra e tërmetit ishte 16 km në veri-perëndim të qytetit të Sagaing, në një thellësi prej 10 km, duke shkaktuar lëkundje të forta që u ndjenë edhe në Kinën jugperëndimore dhe Tajlandë.
Deri tani, 43 punëtorë ndërtimi janë zhdukur pas shembjes së një ndërtese shumëkatëshe në Bangkok, ndërkohë që shifrat e viktimave në Mianmar ende mbeten të paqarta.
Tërmeti goditi afër qytetit të Mandalay, qyteti i dytë më i madh i Mianmarit, me një popullsi prej rreth 1.5 milion banorësh.
Vetëm 12 minuta pas goditjes së tërmetit të parë, një tjetër i magnitudës 6.4 u regjistrua në jug të Sagaing.
Mianmari ka qenë në një situatë të paqëndrueshme politike pas grushtit të shtetit të vitit 2021 nga junta ushtarake, e cila ka kontrolluar mediat dhe ka kufizuar përdorimin e internetit, duke e bërë të vështirë aksesin në informacion.
