Vijon procesi gjyqësor për dosjen “Metamorfoza”, ndërsa Prokuroria e Posaçme ka paraqitur sot pretencën ndaj 7 të pandehurve, të akuzuar për vepra penale me rrezikshmëri të lartë shoqërore.
Në total, SPAK kërkon 74 vite burg për të akuzuarit, me dënimin më të rëndë për Behar Bajrin, 15 vite heqje lirie dhe 14 vite për biznesmenin Pëllumb Gjoka.
Në pretencën e paraqitur në Gjykatë, Prokuroria renditi kërkesat për secilin prej të pandehurve si më poshtë:
• Behar Bajri – 15 vite burg; akuzohet për sigurim kushtesh për kryerjen e vrasjes, pjesëmarrje në grup të strukturuar kriminal dhe korrupsion me zyrtarë të drejtësisë.
• Pëllumb Gjoka – 14 vite burg; akuzohet për sigurim kushtesh për vrasje, armëmbajtje pa leje, pjesëmarrje në grup kriminal dhe korrupsion aktiv ndaj zyrtarëve.
• Edmond Preka – 11 vite burg; akuzohet për të njëjtat vepra si Gjoka dhe i kërkohet konfiskimi i tre automjeteve luksoze (Mercedes Benz, G-Class dhe C-Class).
• Astmer Bilali – 10 vite burg; akuzohet për sigurimin e kushteve për kryerjen e vrasjes dhe pjesëmarrje në grup kriminal.
• Ardit Hasanbegaj – 9 vite burg; për sigurimin e kushteve për vrasje dhe përfshirje në grup të strukturuar kriminal.
• Oltian Bistri – 9 vite burg; akuzohet për korrupsion pasiv, nxjerrje të akteve sekrete dhe pastrim parash. SPAK kërkon gjithashtu konfiskimin e pasurive të tij me vlerë 1.3 milionë euro.
• Xhevahir Lita – 6 vite burg; akuzohet për korrupsion aktiv dhe pasiv.
Të pandehurit akuzohen për përfshirje në një plan për vrasjen e Kleant Musabelliut, Ibrahim Licit dhe Dorian Dulit.
Dosja “Metamorfoza” solli në pranga emra të njohur të botës së drejtësisë dhe të Policisë së Shtetit, përfshirë ish-drejtorin e forcave operacionale Oltion Bistri, drejtuesin e Prokurorisë së Kukësit, Xhevahir Lita, dhe biznesmenin Pëllumb Gjoka.
Sipas SPAK, oficeri Ardit Hasanbegaj i liruar nga detyra një vit më parë dyshohet se ka ndihmuar grupin Bajri për realizimin e vrasjes së mbetur në tentativë ndaj Ibrahim Licit.
Në kërkim vijojnë të jenë disa prej personave të dyshuar si pjesë e këtij grupi kriminal, përfshirë Ervis Martinajn, Denis Bajrin, Klaudio Hakën, Prek Kodrën, Aleks Ndrekën, Arsat Bashlin, Bardhyl Marrajn dhe Elion Haton.
