Presidenti i Republikës, Ilir Meta është takuar ditën e sotme me kryeministri i Sllovenisë, Janez Janša. Meta vlerësoi marrëdhëniet mes dy vendeve dhe ecurinë pozitive ndër vite sa i përket fushave politike, diplomatike, sektorit të sigurisë e veçanërisht në kuadrin e nismave rajonale.
“Kënaqësi e veçantë të takoja sot në Ljubljanë, Kryeministrin e Sllovenisë, Janez Janša. Vlerësuam marrëdhëniet shumë të mira mes dy vendeve, të qëndrueshme dhe me ecuri pozitive ndër vite, në të gjitha fushat me interes reciprok.
E falënderova Kryeministrin Jansa për mbështetjen e dhënë nga Sllovenia në procesin e integrimit europian dhe shpreha besimin, që edhe gjatë Presidencës së ardhshme sllovene të Bashkimit Europian, ajo do të mbetet një avokate e integrimit të Shqipërisë dhe të të gjitha vendeve të Ballkanit Perëndimor në Bashkimin Europian. Tepër i rëndësishëm bashkëpunimi i ngushtë rajonal dhe thellimi i reformave të brendshme, me qëllim final integrimin europian”, deklaroi Meta.
Presidenti Meta nuk u paraqit as sot në Komisionin Hetimor të ngritur për shkarkimin e tij, pasi e konsideroi një hakmarrje dhe se presidenti nuk i ka frikë askujt. Por përveç pretendimeve të Metës, duket se dhe axhenda e tij është e ngarkuar dhe takimet së fundmi me homologë të huaj, kanë qenë të shumta.
