Kryetari i Partisë së Lirisë, Ilir Meta ka hedhur akuza të rënda ndaj SPAK. Nga Korça, ku ishte i pranishëm në një takim me delegatët e Partisë së Lirisë, Meta paralajmëroi ashpër organin e ri të akuzës.
“Duhet ta dijë SPAK-u, se nuk dua t’i them tarallaku, Partia e Lirisë nuk sekuestrohet. Mund të sekuestrohet SPAK përpara, por Partia e Lirisë nuk sekuestrohet. Të bëjnë hetime për kallëzimet që ne kemi bërë, sepse përndryshe pasojat ndaj tyre do të jenë fatale”, tha Meta.
Sipas Metës, qeveria aktuale është e kalbur dhe mbahet vetëm me mekanizmat e Edi Ramës, ndërsa shton se zgjedhjet e 2025 i duken larg.
“Është koha e mposhtjes të një fuqie të kalbur, që bazohet në frikën e imponuar mbi qytetarët shqiptarë dhe mbi paralizimin që i ka bërë opozitës deri tani të ish-lidershipit të saj apo të segmenteve të saj, ka mbaruar. Viti 2025 më duket larg për ndryshim”, shtoi Meta.
