Ilir Meta tregon një prapaskenë të politikës, në kohën kur ishte kryeministër. I pyetur nga gazetarët në Koplik, nëse po i zinte vendin Lulzim Bashës, duke u sjellë si kandidat për kryeministër, ai tha se nuk kishte ambicie për këtë post. Ai foli edhe për marrëdhënien e tij me Fatos Nanon.
“Janë gjera të parëndësishme për mua si politikan këto. Unë kam qenë kryeministër para 20 vitesh, jam krenar që gjysma e rrugëve që ka Shqipëria janë bërë në atë kohë. Nuk kam këtë shqetësim, por po ju them se nga PS kam ikur kur Nano donte të bëhej patjetër President. Ne kishim 84 vota, por u bë një faull dhe arritëm 87, PPE doli me një rezolutë në atë kohë, se Presidenti nuk mund të zgjidhej me aq vota, se kjo gjë minonte integrimin. Unë besoj se ne do i çelim negociatat dhe kushdo del përpara do e shkelim. Unë i thashë Nanos nuk e rrezikoj Shqipërinë për ty. I thashë se duhet të ecim drejt integrimit të Shqipërisë.
Nuk jam i penduar për këtë. Para demokracisë nuk bëj kompromise, s’kam frikë nga zgjedhjet, Shqipëria në integrim nuk është vonuar asnjë sekondë nga Ilir Meta”,- deklaroi Meta duke nënkuptuar se edhe rama kërkon të bëhet president me ndihmën e tij.
/Gazeta Reforma/
