Presidenti Ilir Meta ka kthyer sot ligjin që zgjat afatin e koncesionit të aeroportit “Nënë Tereza” me 13 vjet. Në konferencën për media të zhvilluar ditën e sotme, Presidenti e cilësoi ligjin në shkelje të plotë të Kushtetutës.
“Ky ligj është në kundërshtim me rregullat dhe interesat e shtetit shqiptar, prandaj edhe kontrata shtesë e koncensionarit është mbajtur e fshehrtë. Kjo është skandaloze dhe antiligjore”, deklaroi Meta.
Më tej ai listoi dhe shkeljet, ky një ndër to ishte dhe eleminimi i garës, pasi u lanë vetëm katër ditë kohë.
“Ligji kaloi në 27 janar 2021 në Kuvend nga Qeveria dhe po në atë datë e ka futur Konferenca e Kryetarëve edhe pse nuk u kërkua procedurë e përshpejtuar. Marrëveshja u nënshkrua në Kamëz në 26 janar. Qeverisë iu desh vetëm një ditë që ta firmosë e propozojë Kuvendit për miratim. Ndërkohë që Kuvendi e ka shqyrtuar në komisione në 4 shkurt dhe miruatuar në Kuvend në 8 shkurt. Gjithçka u bë pa asnjë lloj gare”,- tha më tej Meta.
Kujtojmë se Këshilli i Ministrave ka propozuar më herët në Kuvendin e Shqipërisë zgjatjen e kontratës koncesionare të aeroportit të Rinasit nga 22 në 35 vjet, edhe pse kompania koncesionare nuk realizoi investimet e premtuara dhe përfitoi të ardhura shtesë në shkelje të marrëveshjes.
Gjithashtu relacioni i qeverisë që shoqëron projektligjin e publikuar nuk sqaron nëse qeveria ka bërë apo jo një vlerësim të kostove dhe përfitimeve nga zgjatja e kontratës së koncesionit, ndërsa nuk shpjegon gjithashtu se për çfarë arsyeje kjo zgjatje po bëhet pa garë, në një kohë që kontrata aktuale skadon në vitin 2027 dhe normalisht qeveria mund të hapte një tender të ri.
