Ashtu siç edhe është paralajmëruar rreshjet e borës janë bërë më intensive në disa zona të vendit, duke shkaktuar një mori problemesh jo vetëm në energji elektrike dhe qarkullim automjetesh, por edhe në punën e përditshme të disa të punësuarve.
Si çdo vit, situata paraqitet e rënë në zonat e thella malore, kryesisht në very, ku më problematiket duken fshatrat e Kukësit.
Rrugët që lidhin fshatrat me qytetin janë gati të pakaluashme nga trashësia e dëborës dhe ngricat që kanë rënë dhe më shumë këtë e vuajnë mësuesit, të cilët janë përpjekur të shkojnë për të dhënë mësim si çdo ditë.
Problemi konkret duket se është në fshatin Shishtavec, prej nga na vijnë pamje nga gazetari Ermal Hallaçi, i cili tregon mësuesit e bllokuar në rrugë nga bora.
Bashkia dhe Prefektura i kalojnë përgjegjësinë njëra-tjetrës, për shkak të mungesës së fondeve për mirëmbajtjen e rrugëve, ndërsa banorët mbeten në mëshirë të fatit, kur bora të shkrijë nga dielli.
