Thumana përkujton njerëzit e dashur që humbi nga tërmeti i 26 nëntorit të vitit të shkuar. Disa gërmadha të ndërtesave të shkatërruara mbajnë të freskët tronditjen që solli tragjedia. Familjarët kujtuan njerëzit e tyre mes lotësh e lule në duar.
Mëngjesi i një viti më parë do merrte pabesisht jetët e të dashurve të tyre, të cilët sot kanë shkuar t’i kujtojnë në varrezat e Thumanës. Thumana ishte një ndër qytezat që u godit më keq, aty ku familje të tëra u shuan.
Momentet e tmerrit shumë prej tyre duan t’i harrojnë, por ato janë të pashmangshme. “Shkonim aq mirë më njëri-tjetrin. Nuk deshi Zoti. Dhimbja është e fortë. Sardi i shkretë me zor e rritëm, mbeti me të ëmën në rrënojat e pallatit.” “Nuk di ta përshkruaj, e përjetoj sa herë më kujtohen. Tmerri që ka qenë mos ardhtë më, mos i raftë kujt me e provu!”
Gjithçka në Thumanë, edhe pse tashmë ka kaluar një vit, përcjell dhimbje, por ata njerëz çdo ditë kërkojnë forcë që të ringrihen.
/GazetaReforma.com/
