Në fillim të pandemisë, seancat gjyqësore u mbyllën për të shmangur rrezikun e infektimit nga Covid-19, duke lënë shumë qytetarë në “rrugë të madhe”.
Kjo zvarritje prej 85 ditësh nga ana e gjykatave ka treguar paaftësi nga ana e tyre, për të mos llogaritur këtu edhe numrin e çështjeve të grumbulluara që presin të shqyrtohen.
“Gazetareforma” herë pas here e ka ngritur këtë shqetësim, i cili duket se ka marrë zgjidhje së fundmi.
Qeveria shqiptare, me vendim të Këshillit të Ministrave ka vendosur që të rihapen të gjitha gjykatat për të zhvilluar seancat e planifikuara gjyqësore.
Sipas Dosja.al, në aktin normativ, të ndryshuar me vendim të Këshillit të Ministrave, thuhet se tashmë, pas periudhës së pandemisë, do të nisë rizhvillimi i seancave gjyqësore, por duke zbatuar një protokoll sigurie.
Në vendim thuhet se duhen shmangur grumbullimet në ambientet e gjykatave dhe brenda sallave gjyqësore. Të gjitha senacat do të zhvillohen me dyer të mbyllura, pa praninë e mediave dhe pa praninë e publikut.
