Gjyqtarja Mimoza Margjeka ka shkuar mëngjesin e sotëm në GJKKO, në seancën e bërë ndaj saj për rivlerësimin e masës së saj të sigurisë.
Margjeka ka kërkuar që mediat të ishin të pranishme në sallën gjyqësore dhe ka kërkuar nga GJKKO që seanca të zhvillohej me dyert të hapura.
Gjyqtarja është shprehur për mediat se ajo është e vetmja që nuk i ka dhënë mandatin kryebashkiakes së re të Durrësit.
”Do kërkoj shfuqizimin e masës, dosja është përrallë, është thashethem, nuk di se çfarë të them. Unë do kërkoj foninë jashtë, gazetarët duhet të futen, meqë tre ditë u trumbetua që gjyqtarja ka marrë 6 mijë euro, unë dua që gazetarët të jenë në sallë.
Kam 30 vite në gjyqësor, kam 4 diploma. Ju e dini shumë mirë që unë jam gjyqtarja e vetme që kam bërë nul procesin e 30 Qershorit. Gojën nuk ma ndalon asnjë njeri, dosjen nuk e nxjerr dot, nxirreni me autoparlant si në kohën e Enverit, ne nuk jemi njerëz nga rruga”- ka thënë e revoltuar gjyqtarja Mimoza Margjeka .
Kujtojmë se Margjeka u akuzua për korrupsion pasi nxori nga qelia, Orion Balin të akuzuar për trafik emigrantësh. Bashkëshorti i gjyqtares, dekani i Juridikut në UAMD, Arben Cara,, vetë Margjeka si dhe avokati Skënder Demiraj, janë akuzuar për korrupsion pasi do të merrnin 6 mijë deri në 10 mijë euro për lirimin e një të dënuari.
