Ditën e djeshme, mediat greke kanë publikuar videon në të cilën një shqiptar ka grabitur nën kërcënimin e armës një lokal. Grabitja ka ndodhur në zonën e Gerakas në Athinë.
Shqiptari ka hyrë i armatosur në lokal, i maskuar me kapuç e doreza, ku me armë në dorë i ka kërkuar punonjëses t’i japë të gjitha paratë që ndodheshin në arkë.
Edhe në video duket qartë që të pranishëm në lokal janë vetëm dy klientë dhe punonjësja e cila është e ulur në pjesën e banakut.
Grabitja ka ndodhur për një minutë, pasi edhe punonjësja apo klientët nuk kanë bërë rezistencë. Nuk ka vonuar shumë minuta pas ngjarjes që ka ardhur policia. Nga pamjet e sekuestruara është bërë i mundur edhe identifikimi i shqiptarit e më pas kapja e tij.
Në komisariatin e policisë, shqiptari është shprehur se ai e kishte kryer grabitjen për arsye personale dhe se qëllimi i tij nuk ka qenë të lëndojë askënd.
“Më duhen para për të mbajtur familjen”, ka deklaruar shqiptari.
