Ka kaluar rreth një muaj që nga dita kur u mor peng në Kamëz 49-vjeçari Jani Preng dhe ngjarja i ngjan çdo ditë e më shumë një seriali.
Me krijimin e OFL u bë e mundur goditja e disa personave të dyshuar për këtë ngjarje(kujto: familjen Hajri dhe 6 personat në Shkodër), ndërsa i dyshuari kryesor si porositësi i rrëmbimit mbetet Gramoz (Dritan) Rexhepi.
Dyshohet se 40-vjeçari qëndron në krye të një bande droge, pjesë e së cilës është edhe vëllai i viktimës, Anton Prenga.
Mësohet se ky i fundit ka nxjerrë 280 kg kokainë nga një port në Angli, por nga sa i ishte kërkuar, ai nuk e ka dorëzuar te grupi në fjalë.
Kjo bëri që banda të urdhëronte rrëmbimin e 49-vjeçarit, si formë presioni ndaj Anton Prengës.
Dritan Rexhepi ka dhënë një intervistë të detajuar për gazetarin Artan Hoxha, ku mohon në mënyrë kategorike të ketë lidhje me këtë ngjarje, ndërsa pritet edhe publikimi i pjesës së 3 të intervistës.
Pjesa parë:Akuzohet për vrasjen e Jani Prengës, ja çfarë ka për të thënë Dritan Rexhepi
Pjesa e dytë: Ëndërrat, pengu i 2006 dhe bashkëjetesa me kokat e kokainës, rrëfehet Dritan Rexhepi
Së fundmi, bëhet me dije se vëllezërit e viktimës kanë komunikuar disa herë në telefon me një “boss droge” që ndodhet në burgun e Ekuadorit si edhe me Gentjan Doçin nga Dukagjini pas pengmarrjes me qëllim gjetjen e një marrëveshjeje për kthimin e pengut.
ABC news ka zbardhur dëshminë e Anton Prengës, në të cilën ai tregon para prokurorëve se vëllai tjetër Ndrek Prenga ka folur në telefon me Gentjan Doçin dhe “Gramozin nga Vlora”, të cilët i kanë kërkuar dorëzimin e sasisë së kokainës së grabitur.
Në dëshmi ndër të tjera shkruhet: “Gramozi nga Vlora” shprehet se nuk po lidhet dot në telefon ne Gentjan Doçin “pasi kishte pirë mall dhe duhej të prisnin deri sa t’i dilte..”.
Në fund, Gramozi i ka thënë vëllait të Jan Prengës se pengmarrësit i kishin dalë nga fjala duke e vrarë pengun, gjë që e detyroi atë të tregonte emrat e pengmarrësve.
Pjesë nga dëshmia e Anton Prengës:
Ditën e mërkurë të kësaj jave mesa më kujtohej ka qënë data 22 janar 2020, është kthyer malli dhe po atë ditë Gramozi, ka kontaktuar në telefon me Ndrekën Astritin dhe Gëzimin dhe ju ka thënë se brenda dy orësh vëllai i marrë peng Jan Prenga do lirohet.
Pasi kemi pritur 2-3 orë dhe vëllai s’po lirohej të nesërmen ka fol vëllai im Ndreka me Gramozin dhe ai Gramozi, i ka thënë që s’ka mundësi që nuk është liruar.
Më pas Ndreka është lidhur sërisht me Gramozin dhe ai i ka thënë se me njërin prej tyre kishte kontaktuar ndërsa me një tjetër nuk kishte kontaktuar ende, pasi ai kishte pirë mall dhe pa i dalë malli nuk kontaktojmë dot.
Gramozi, gjithashtu i ka thënë vëllait mos të shqetësohej se vëllai ishte shëndoshë e mirë dhe do të lirohet pasi ti dali malli personi që përmendi ai më lart.
Pasi ka kaluar sërish kohë dhe vëllai spo lirohej, vëllai im Ndreka ka kontaktuar sërisht me telefon me Gramozin dhe në këtë moment Gramozi, i ka thënë se më kanë lëvizur nga fjala ata personat, unë të detyrohem të të jap emrat e tyre dhe i ka thënë vëllait se personat të cilët e kanë marrë peng apo kanë organizuar pengmarjen quhen Gentjan Lush Doçi, Gentjan Nik Bleta dhe një shtetas tjetër me emrin Korado Doda.
