Pas tërmetit shkatërrimtar të 26 nëntorit, e gjithë bota është solidarizuar me Shqipërinë.
Së fundmi, Kryepeshkopi i Kishës Ortodokse, Anastas Janullatos, ka nisur një fushatë në televizionin shtetëror “ERT”.
Ai u ka bërë thirrje qytetarëve grekë, që të ndihmojnë të prekurit nga tërmeti.
Me fondet që do të mblidhen, Kisha Ortodokse do të ndërtojë disa shtëpi.
Fushata do të zgjasë disa ditë dhe nuk dihet sesa është fondi i grumbulluar deri më tani.
Greqia solli gjithashtu në Shqipëri trupa për operacionet e kërkim shpëtimit, si dhe inxhinierë për të bërë ekspertizën e dëmeve në banesat e dëmtuara.
Kujtojmë këtu, se më 26 nëntor Shqipëria u godit nga tërmeti më i fuqishëm i 30 viteve të fundit, i cili la pas 51 viktima.
Qindra persona mbetën të plagosur, ndërsa mijëra qytetarë mbetën pa shtëpi.
