Vendimi i qeverisë për të kthyer Porto Romanon në një park ekologjik duket se nuk ka qenë një vendim i menduar në detaje, pasi ende nuk ka një landfill për mbetjet urbane të qytetit të Durrësit.
Kompania e pastrimit ka tentuar t’i depozitojë ato në fshatin Vadardhë të njësisë administrative Sukth, por ka hasur në rezistencën e banorëve, të cilët janë ngritur në protestë, madje kanë bërë roje natën për të mos lejuar kamionët të derdhin mbetjet në fushë.
Banorët janë shprehur në një intervistë për Report Tv se Bashkia e Durrësit kërkon ta kthejë fshatin e tyre në një vatër mbetjesh, teksa shtojnë se nuk plotësohen kushtet për fushë mbetjesh dhe po të hidhen buzë kanalit ato përfundojnë në det.
“Siç e shihni edhe ju vetë këtu nuk plotëson kushtet për fushë mbetjesh. Po të hidhen buzë kanalit ato përfundojnë në det. Ne do të bëjmë roje non stop dhe nuk i lejojmë të vijnë plehrat këtu. Kryetari i njësisë administrative thotë këtu do i bie se s’ka vend tjetër. Këtu është për hetim nga prokuroria për masakrën mjedisore”, thanë më tej banorët në protestë.
Nga ana tjetër, kreu i njësisë administrative të Sukthit, Rrapo Osmani ka pranuar se ka zhvilluar takim me kryetarin e Bashkisë së Durrësit, ku i është kërkuar që mbetjet të depozitohen në mënyrë provizore në Sukth.
Kryeministri Edi Rama ka deklaruar kohë më parë, se mbetjet urbane të qytetit të Durrësit nuk do të depozitohen më në Porto Romano, por do të transferohen në landfillin e Sharrës.
Sipas Report Tv, nuk kanë fonde për të paguar firmën e pastrimit që t’i dërgojë mbetjet ditore në Sharrë, teksa zëdhënësi i bashkisë sqaron se janë kërkuar fonde shtesë nga Ministria e Financave, por ende nuk janë miratuar.
Në pritje në këtyre fondeve, qeveria kërkon ta zgjidhë emergjencën duke kthyer Sukthin në fushë mbeturinash.
