Partia Socialiste është tërhequr nga shkarkimi i Presidentit Meta nga detyra. Deputetët socialistë kanë deklaruar në Komisionin Hetimor se shkeljet e kryera nga Meta nuk përbëjnë shkak për shkarkim.
Mazhoranca dhe opozita parlamentare kanë paraqitur dy raporte të ndryshme dhe sipas të gjitha gjasave në parlament do të shkojnë dy qëndrime për kreun e shtetit nëse ka shkelur Kushtetutën me dekretin për anulimin e zgjedhjeve lokale të 30 qershorit të vitit të kaluar, por edhe emërimet në Gjykatën Kushtetuese.
Deputetja e PS Klotilda Bushka theksoi se shkeljet e kryera nga Presidenti ekzistojnë, por kjo përplasje bën që të miratohen disa rregullime ligjore në mënyrë që në të ardhmen të mos kemi probleme të ngjashme.
Debati në komisionin hetimor
Ulsi Manja: Sot do të bëhet prezantimi i raportit. Nëse Valteri ka raport të opozitës parlamentare do të dorëzojë sot dhe në përfundim do u shpërndahen kolegëve që të hënën të kemi diskutim përfundimtar. Nëse kemi dakordësi do të miratojmë një raport, nëse ka qëndrime të kundërta, do të shkojë në Kuvend një raport me dy qëndrime.Halit Valteri: Drejt seancës do të shkojmë me dy raporte dhe do të paraqesim një qëndrim tonin si opozitë parlamentare.
Relatorja Klotilda Bushka: Analiza e të gjitha provave që janë administruar i është nënshtruar edhe interpretimet të natyrës së shkeljeve dhe është vlerësuar nga gjithë procesi që është kryer që të analizohet shkelja e rëndë; nga rrethanat dhe pasoja. Kam menduar që ne nuk mund të marrim në konsideratë disa që janë ekskluzivitet i gjykatës Kushtetuese. Nisur nga provat dhe natyra e komisionit hetimor që është teknik dhe jo politike, jemi fokusuar te analiza e provave dhe rezultuan disa shkelje si në kuadër të ushtrimit të kompetencave për shkeljet, por edhe emërimet në Kushtetuese, që analizohen në raport. Këto shkelje referuar rrethanave dhe pasojave dhe fakti që komisioni nuk mund të shprehet se janë ekskluzivitet i gjykatave, janë shkelje që kanë natyrë që diktojnë marrjen e masave të menjëhershme për plotësimin e aktit kushtetueses për evitimin e situatave bllokuese, por nuk janë të mjaftueshme për të justifikuar shkarkimin e Presidentit
Kujtojmë këtu se Komisioni Hetimor u ngrit pas dekretit të presidentit për shtyrjen e zgjedhjeve lokale të 30 qershorit. Mazhoranca e konsideroi veprimin e Metës një krizë të prodhuar artificialisht. Ndërkohë pjesë e hetimeve është edhe dekretimi i Marsida Xhaferllarit si anëtare e Gjykatës Kushtetuese, ndërsa Kuvendi kishte zgjedhur Arta Vorpsin.
Pak muaj më parë u mor në pyetje edhe kreu i KED, Ardian Dvorani, i cili dha shpjegime përsa i takon emërimeve në Drejtësi. Konflikti mes Metës dhe maxhorancës kulmoi me tubimin e disa javëve më parë, ku presidenti akuzonte Ramën për grusht shteti. Shkak për tubimin u bë miratimi i projektligjit për dekretimin e anëtarëve të Gjykatës Kushtetuese, duke shfuqizuar rolin e presidentit.
