Pas dy përpjekjesh dhe një rrugëtimi të pazakontë drejt dijes, Skënder Cena, 74 vjeç, ka arritur të marrë diplomën e Maturës Shtetërore.
Në provimin e gjuhës së huaj, që ishte dhe sfida më e madhe për të, ai është vlerësuar me notën 7, duke tejkaluar edhe pritshmëritë e veta, pasi gjatë ditës së testimit kishte shprehur besimin se do të arrinte të paktën notën 6.
Historia e Skënderit është e mbushur me sfida. Një aksident në rini, në hidrocentralin e Fierzës, i preu rrugën e shkollimit, duke i dëmtuar shikimin dhe duke e vendosur përballë vështirësive të mëdha ekonomike.
Por pas dekadash, kur ishte 64 vjeç, ai vendosi të rikthehej në bankat e shkollës, duke ndjekur një program profesional në Kamëz. Atëherë, mosha dhe mungesa e praktikës me anglishten nuk e ndihmuan të kalonte maturën.
Në tentativën e dytë, me më shumë përkushtim dhe mbështetjen e familjes, ai arriti ta përmbushte ëndrrën.
Edhe pse ndonjëherë përballej me kureshtjen apo keqkuptimin e të tjerëve, ai rrëfen se është ndjerë i mirëpritur: “Mësuesit dhe sekretarja më kanë pritur shumë mirë. Nxënësit menduan se isha profesor…”
Me diplomën tashmë në dorë, Skënder Cena është një shembull frymëzimi se vullneti për të mësuar nuk njeh moshë dhe as pengesa fizike.
