Një grup i vogël maturantësh doli sot në protestë para Ministrisë së Arsimit, për të denoncuar mënyrën e zhvillimit dhe korrigjimit të provimeve të Maturës Shtetërore 2025.
Ata pretendojnë se provimi i matematikës u zhvillua pa një test model, duke i lënë nxënësit pa orientim të qartë dhe pa mundësi përgatitjeje të drejtë.
Kritika të forta u drejtuan edhe ndaj korrigjimit të testit të gjuhës angleze, të cilin protestuesit e cilësuan si “skandaloz”, ndërsa për gjuhën dhe letërsinë shqipe, akuzuan për pyetje të paqarta dhe vlerësim të padrejtë.
“Jemi vetëm 11 sot, por përfaqësojmë 27 mijë maturantë. Kjo nuk ka të bëjë vetëm me notat, por me të drejtën tonë për një arsim të ndershëm dhe të barabartë,” deklaroi një prej tyre.
Ata kërkojnë rishikim të tabelës së pikëve dhe një hetim të plotë mbi mënyrën e korrigjimit, veçanërisht për provimin e anglishtes, ku shumë maturantë kanë shprehur pakënaqësi për rezultatet që nuk përputhen me pritshmëritë e tyre.
Protestuesit u bënë thirrje bashkëmoshatarëve që t’u bashkohen, në mënyrë që, zëri i maturantëve të mos injorohet më.
