Koronavirusi në Shqipëri po bënë ‘kërdinë’ në ditët e fundit, me infektime por edhe me humbje jete. Kjo gjë po u ndodh më shumë njerëzve të varfër dhe në pamundësi për të kuruar sëmundjen, që përveç se e rëndë është bërë edhe shumë e kushtueshme.
Farmacitë, klinikat private, mjekët por edhe shumë biznese që kanë lidhje me produktet, pajisjet apo preparatet, që shërbejnë kundër COVID-it, duket se janë në ditët më të “arta” të tyre pasi po bëjnë para me fatkeqësinë që i ka rënë gjithë botës.
Por spekulimi më i ri po bëhet sidomos me aparatet respiratorë dhe me shitjen e bombolave të oksigjenit, ku tregu i zi ka lulëzuar dhe në qindra euro lëvizin çmimet nëpër faqet online.
Për këtë edhe “Gazeta Reforma” botoi sot më herët një shkrim ku tregonte spekulimin që po bëhej me këto produkte jetike, për një pjesë të popullsisë.
Nisur nga kjo situatë e krijuar në tregje, kur më parë duhet të reagonte Autoriteti i Konkurrencës, Prokuroria e Tiranës ka vendosur nisjen e hetimit, edhe pas një denoncimi të dy vëllezërve që blenë një aparat respirimi në Facebook për babain e sëmurë.
Kjo duket ishte edhe indicia e parë për organin e akuzës së kryeqytetit, ku nga një kallëzim i tri javëve më parë, dy vëllezër treguan se si kishin të sëmurë babanë e tyre me COVID-19 dhe ishin detyruar që të blinin në tregun e zi një aparat oksigjeni që u sigurua nga Facebook.
Ata kallëzuan në prokurori faqen ku blenë aparatin, ndërsa deklaronin se babai u dërgua në spital 4 ditë para se të ndërronte jetë. Në lupën e prokurorisë është edhe rasti i të dielës, ku një të moshuari i shpërtheu bombola e oksigjenit.
Prokuroria e Tiranës e nisi hetimin bazuar edhe në shitjen e bombolave të oksigjenit në faqet online, përfshirë këtu edhe pikat e saldimit, dhe reklamimin në Facebook.
Mosshtrimi i të prekurve në spitale, ka krijuar një treg të zi të shitjes së bombolave të oksigjenit, të cilat sipas burimeve shiten rëndomë në internet. Këto aparate në këto faqe shiten me vlera që variojnë nga 500 deri në 800 euro, por edhe me qira ditore në çmimin 100-120 euro.
Autoritetet prej disa javësh iu kanë bërë thirrje qytetarëve të mos bien pre e abuzimeve dhe se, trajtimi ambulator në shtëpi nuk mund të bëhet pa asistencën e mjekëve.
/GazetaReforma.com/
