Gjashtë zyrtarë të Bashkisë Devoll janë dërguar për gjykim nga prokuroria për shkak se kanë mashtruar me tenderë për shtrimin e rrugëve, konkretisht për blerjen e karburantit dhe disa materialeve ndërtimit.
Sipas informacioneve, Ndaj tyre rëndon akuza ‘falsifikim i dokumenteve’ dhe janë marrë të pandehur, pas hetimeve të nisura që prej vitit 2023, mbi dyshimet për abuzime financiare.
Në skemën e zbuluar nga hetuesit,rezulton se të dyshuarit zhvillonin tenderë dhe nuk blinin materiale për mjete apo për shtrimin e rrugëve, por i përvetësonin.
Të pandehurit janë G.K., drejtor i Agjencisë së Shërbimeve Utilitare dhe Administrative, A.C., përgjegjës në Shërbimet Publike, K.M., përgjegjës në sektorin e Transportit Publik, E.N., magazinier i Menaxhimit Financiar, H.Ç., dhe J.B., me detyrë shoferë.
Nga verifikimet e kamerave të sigurisë u zbulua gjithashtu se mjetet e transportit nuk kishin lëvizur për të zhvendosur materialet, si çakulli dhe as karburanti nuk ishte harxhuar. Në këtë mënyrë shpenzimet e regjistruara rezultuan fiktive, kurse paratë në xhepat e të pandehurve.
Njoftimi i Prokurorisë Korçë:
“Prokuroria pranë Gjykatës së Shkallës së Parë të Juridiksionit të Përgjithshëm, Korçë, përfundoi hetimet dhe dërgon në gjyq gjashtë persona, punonjës të Bashkisë Devoll, të akuzuar për veprën penale ‘Falsifikim i dokumentave’ e parashikuar nga neni 183/3 i Kodit Penal.
Në kuadër të hetimeve të procedimit penal nr.326 të vitit 2023, prokuroria arriti në përfundim se shtetasit G.K., me detyrë Drejtor i Agjencisë së Shërbimeve Utilitare, Komunitare dhe Administrative, A.C., Përgjegjës në Sektorin e Shërbimeve në Agjencinë e Shërbimeve Publike, K.M., Përgjegjës në sektorin e Transportit në Agjencinë e Shërbimeve Publike, E.N., Magazinier në Sektorin e Menaxhimit Financiar, dhe H.Ç. e J.B. me detyrë shoferë, kanë konsumuar veprën penale për të cilën janë akuzuar.
Këta shtetas u kallëzuan nga shtetasi B.N.,për procedurën e prokurimit me objekt blerje mallra e materiale ndërtimi për nevojat e Bashkisë Devoll. Kallëzuesi denoncoi se pas kryerjes së procedurës është shpallur fituesi dhe u kryen në mënyrë fiktive si procedurat e marrjes në dorëzim dhe magazinimit të mallrave dhe pajisjeve ashtu dhe dalja e tyre nga magazinimi dhe përdorimi në punime të ndryshme nga punonjësit e bashkisë.
