Struktura e Posaçme kundër Krimit të Organizuar dhe Korrupsionit ka nisur hetime për disa qendra call-center.
Burimi nga Prokuroria e Posaçme bëjnë me dije se hetuesit e kësaj strukture janë duke hetuar disa kompani call-center me qendër në kryeqytet.
Janë mbi 10 kompani që dyshohet se kanë mashtruar me shuma të mëdha një numër të konsiderueshëm qytetarësh të Bashkimit Evropian. Hetimet e SPAK janë duke u kryer në kuadër të organizatës kriminale.
Ndërkohë në lidhje me këtë çështje ka dhënë të tjera detaje edhe gazetari investigativ, Artan Hoxha.
Nga studio e ABC News, Artan Hoxha tha se hetimi i SPAK është përqëndruar vetëm tek ata që janë regjistruar në QKB, por sipas tij shumica janë të paregjistruara.
“SPAK ka filluar të hetojë këta me letra, këta të QKB. Por pjesa dërmuese nuk kanë letra, nuk kanë asnjë copë letër.
Policia e di ku ndodhen dhe nuk ka treguar. Madje edhe janë paguar.
Janë në nivelin e lojërave të fatit para mirartimit të ligjit. Janë punësuar me mijëra të rinj që edhe paguhen mirë dhe janë operatorë të zotë.”-tha Artan Hoxha.
Po ashtu gazetari Hoxha tha se shanset që pre e tyre të bien qytetarë shqiptarë janë minimale, pasi sipas tij ata kërkojnë njerëz të fuqishëm ekonomikisht, që kanë mundësi të investojnë.
“Populli shqiptar është një popull i varfër. Shanset që pre e call centerave të bien qytetarë shqiptarë janë minimale.
Pre e tyre janë qytetarë të huaj që kanë mundësi të investojnë.
Ka raste që kanë ardhur qytetarë nga jashtë personalisht e kanë gjetur call center dhe e ka detyruar të kthejë paratë”-u shpreh Artan Hoxha.
