Ish-prefekti i Lezhës, Altin Jaku është dënuar me pesë vite burg për akuzat e “Mashtrimit”. Këtë të hënë është lënë në fuqi vendimi i Gjykatës së shkallës së Parë në Lezhë, e cila kishte dhënë vendimin me 6 vite burg që në vitin 2017. Apeli i uli 1 vit heqje lirie, duke e dënuar përfundimisht me 5 vite burg.
Jaku akuzohet se iu ka marrë shtetasve A. Baruti dhe Gj. Kola një sasi të madhe parash, gjatë kohës kur ka qenë drejtor i një filiali banke të nivelit të dytë në Lezhë. Shtetasve A. Baruti dhe Gj. Kola iu janë zhdukur paratë nga banka përmes disa transfertave për të cilat është provuar se përgjegjës për këto veprime ka qenë ish-prefekti i Lezhës Altin Jaku.
I gjithë procesi gjyqësor, ndaj ish-prefektit të Lezhës është zhvilluar në mungesë, pasi ai ka humbur gjurmët para se dosja të kalonte për gjykim.
Gjithashtu një tjetër arrestim është kryer në këtë qytet. Policia ka vënë në pranga Agustin Gjinin, Shefi i Sigurisë së Portit të Shëngjinit.
Gjini është arrestuar të premten pasi dyshohet se ka tjetërsuar sipërfaqe toke në Shëngjin. Ai dyshohet dhe për flasifikim dokumentash të pronave, gjatë kohës që ka qenë në postin e Përgjegjësit të Sekotrit të Arkivit dhe Protokollit.
Deri më tani gjykata e Lezhës ka vendosur masën e sigurisë “detyrim paraqitje”.
