Ditën e sotme ka mbërritur para gjykatës së Ebasanit autori i vrasjes së Jetlira Elezajt në Elbasan. Ramis Mici në sallën e gjyqit është shprehur se “nuk mban mend ditën e lindjes dhe ka pranuar se ka qenë i dënuar më parë për dhunë.” Ndërkohë Gjykata e Elbasanit ka vendosur masën e sigurisë “arrest me burg” për 37-vjeçarin Ramis Mici. Avokati i caktuar nga shteti kërkoi analizimin e gjendjes se tij mendore, gjë që nuk u pranua nga gjykata.
Si ndodhi ngjarja
Ngjarja makabër ndodhi në Elbasan ku krimi në familje la një person të vdekur, pas një konflikti me një çifti bashkëshortësh. Si pasojë e dhunës së vazhdueshme Jetlira Elezi kishte kërkuar ndihmë pranë autoriteteve për të marrë një urdhër mbrojtjeje. Por kjo nuk i shërbeu të resë pasi pak ditë me parë mbeti e vrarë me thikë nga bashkëjetuesi i saj.
Pronari i banesës ku dy 37-vjeçarët jetonin me qira ka treguar për mediat se para pesë ditësh ata kishin pasur një zënkë. Pas konfliktit, Ramis Mici vijoi të jetonte në ambientet që ata kishin marrë me qira në katin e tretë ndërsa Jetlirën pronari i shtëpisë e kishte siguruar në ambiente të tjera në kat të parë. Ishte ai që e gjeti 37-vjeçaren të mbuluar nga gjaku.
“Doli ai nga dera, e kishte përplas derën. Kur e pashë ajo kishte rënë përmbys, gjak dynjaja. Kjo ka ndodh nga ora 12.50.”
Ramis Mici, baba i dy fëmijëve nga martesa e parë, pasi qëlloi për vdekje me thikë bashkëjetuesen e tij u largua nga vendi i ngjarjes.
Pas më shumë se 24 orësh kërkime, Mici u gjet i fshehur poshtë përroit të Zaranikës, ku u arrestua. Ishte qeni që çoi policinë në gjurmët e autorit.
37-vjeçarja Jetlira Elezi kishte 6 vite që bashkëjetonte me Micin në një shtëpi që e kishin marrë me qira në lagjen “Skënderbej.”
Ajo ishte nga qyteti i Belshit, dhe kryesisht të dy ishin pa punë të qëndrueshme. Ndërsa Ramis Mici, sipas dëshmive dhe në martesën e parë kishte shfaqur të njëjtat probleme me dhunën.
