Autori i dyshuar i masakrës në Shkodër, Ragip Gila, është marrë në pyetje nga policia në lidhje me atentatin e ndodhur një ditë më parë. Bashkë me të, është pyetur edhe shënjestra e dyshuar e sulmit, Erogen Vaso.
Nga spitali i Traumës në Tiranë, Vaso ka mohuar çdo konflikt, duke deklaruar: “Nuk kam konflikte, jam biznesmen, qytetar i ndershëm dhe kam kontribute në komunitet”.
Ndërkohë, dëshmia e Gilës është krejt e kundërt. Ai ka pretenduar se Vaso i kishte bllokuar rrugën me një makinë të blinduar disa muaj më parë dhe e kishte ofenduar.
Sipas hetimeve paraprake, Armando Pali dhe Erogen Vaso po pinin kafe në një lokal pranë Bashkisë së Shkodrës, kur Ragip Gila qëlloi me breshëri plumbash në drejtim të tyre. Shënjestra e atentatit dyshohet se ka qenë Erogen Vaso.
Nga të shtënat humbën jetën në vend Armando Pali dhe Liridon Kraja (i njohur si Lushi), 31 vjeç, truprojë i Vasos. Kraja ndërroi jetë në spital si pasojë e plagëve të rënda.
Të plagosur mbetën Erogen Vaso, i cili mori tre plumba dhe ndodhet në spitalin e Traumës, si edhe kamarierja 25-vjeçare e lokalit, Meri Kaceri.
Hetimet vijojnë për të sqaruar rrethanat e plota dhe motivin e masakrës.
