Eksperti i çështjeve të pensioneve, Kujtim Hoxha, ngriti shqetësime mbi zbatimin real të marrëveshjes mes Shqipërisë dhe Italisë për njohjen e viteve të punës, gjatë një interviste në emisionin “Koha për t’u zgjuar”.
Ai vlerësoi rëndësinë e kësaj marrëveshjeje për qytetarët shqiptarë që kanë punuar në Itali, por theksoi se pengesat burokratike dhe institucionale po e bëjnë të vështirë zbatimin e saj.
Hoxha nënvizoi se ligji që njeh vjetërsinë në punë për emigrantët nuk po funksionon në praktikë. Më shumë se 75% e dosjeve që dërgohen për njohje rezultojnë me probleme në të dhëna, kryesisht për shkak të mungesës së dokumentacionit të saktë nga institucionet shqiptare.
Sipas tij, mbështetja e pamjaftueshme nga qeveria dhe mungesa e një strukture të koordinuar po pengojnë përfitimin e të drejtave nga qytetarët.
Ai u bëri thirrje autoriteteve që të marrin masa konkrete për të përmirësuar procesin dhe për të respektuar marrëveshjen e nënshkruar me Italinë.
