Edhe në Maqedoninë e Veriut, numri i të infektuarve me Covid-19 po rritet çdo ditë dhe kjo ka sjellë masa kufizuese për parandalimin e përhapjes së mëtejshme.
Ditën e djeshme, ministri i Shëndetësisë në Maqedoninë e Veriut, Venko Filipçe tha se në fillim të muajve të parë të vitit 2021 do të kemi vaksinën kundër koronavirusit. Ministri Filipçe tha se është optimist se dy vaksina për një kohë të shkurtër do të marrin aprovimin për përdorim.
“Edhe kompania e dytë pas kompanisë AstraZeneca, kompania Pfizer ka aplikuar për leje për përdorim në Agjencinë Evropiane për Ilaçe, kjo procedurë zakonisht zgjat disa muaj, kur të mbarojnë të gjitha fazat klinike të testimit, nisin procedurat administrative. Besoj se do të japin leje me të ashtuquajturën, procedurë urgjente dhe se deri në Vitin e Ri do të marrin leje dy vaksinat për distrubuim”, tha Filipçe.
Ministri tha se Maqedonia e Veriut tashmë është pjesë e COVAX mekanizmit, dhe se përveç këtij mekanizmi kanë edhe dy oferta nga Polonia dhe Greqia për furnizim me vaksinë.
“Ne i presim vaksinat përmes COVAX mekanizmit, kjo do të thotë se secili prodhues, këto dy kompani vetëm se janë pjesë e këtij mekanizmi, pasi të marrin lejen për përdorim, i shpërndajnë dozat dhe pastaj vakcinat shpërndahen në mënyrë të barabartë në të gjitha shtetet që janë pjesë këtij mekanizmi. Ne e kemi nënshkruar këtë marrëveshje, qeveria ka ndarë buxhet, dhe i presim vaksinat përmes këtij mekanizmi. Kemi edhe dy oferta tjera, njëra nga Polonia dhe tjetra përmes kryeministrit grek Micotakisi, i cili në takimin në Selanik ka shprehur vullnetin dhe mundësinë që të jemi pjesë e sasisë së tyre të prokurorimit, ku si vend anëtarë në BE, do të furnizohet me vaksinë përmes kontratës së drejtpërdrejtë me kompaninë AstraZeneca”, pohoi Filipçe.
