Disa herë është hedhur ideja për një lidhje hekurudhore mes Shqipërisë dhe Maqedonisë së Veriut, linjë e cila do të niste nga kufiri i dy shteteve në afërsi të fshatit Lin, Pogradec dhe do të përfundonte në portin e Durrësit.
Por edhe pse Shqipëria e kishte thuajse gati vetëm disa vite më parë këtë linjë, e cila funksiononte (Elbasan-Librazhd-Përrenjas-Lin-Guri i Kuq), Maqedonisë së Veriut i duhej një investim akoma më i madh.
Sipas një preventivi, 426 milionë euro do të nevojiten për fazën e parë për ndërtimin e hekurudhës nga Kërçova, deri në kufirin me Shqipërinë.
Ky është një investim i komplikuar, kërkon edhe para si dhe resurse të tjera, tha Festim Halili, drejtori i Hekurudhave të Maqedonisë.
Ai shpjegoi se, vetëm Maqedonia e Veriut nuk e ka përfunduar pjesën e saj nga “Korridori 8”. Problem në këtë situatë, siç thotë Halili, nuk janë vetëm financat por edhe papajtueshmëritë mes institucioneve në qeverinë e mëparshme.
Nevojiten katër vjet për përfundimin e fazës së parë, ndërkohë që ndërtimin e projektit në mënyrë shtesë e vështirëson edhe terreni kodrinoro-malor për çka do të nevojitet të nderohen 49 ura dhe 13 tunele.
Janë planifikuar edhe dy stacione kryesore hekurudhore në Mesheishte dhe Strugë, ndërsa do të ketë edhe 4 mini-stacione afër transesë.
Faza e parë e projektit kushton 426 milion euro, ndërsa për të dy fazat e projektit nevojiten gjithsej 525 milion euro.
Por a do të mundet të mbajë këtë ngarkesë kjo ndërmarrje publike në kushte kur, sipas shumicës, kompania po përballet me borxhe?
“Këto janë projekte të mëdha dhe pa ndihmën e Ministrisë së financave dhe Qeverisë nuk mundemi t’i realizojmë. Të ardhurat tona si ndërmarrje janë shumë të ulëta në krahasim me planin për investime që e kemi për vitet e ardhshme”,- theksoi Festim Halili.
Nga ana tjetër, Ministri maqedonas për Transport dhe Lidhje, Bllagoj Boçvarski, në intervistën 10 Minuta në TV21 përsëriti se projekti e konfirmon edhe angazhimin e Qeverisë se do të investojë edhe në pjesën Perëndimore dhe Lindore të “Korridorit 8”.
Qeveria të martën nxori vendim që për ndërtimin e hekurudhës nga Kërçova deri në kufirin me Shqipërinë, të kërkojë 426 milionë euro nga institucionet financiare ndërkombëtare dhe kreditorët bilateral si, grant mjete për ndihmë teknike, por tani për tani vetëm për projektin deri në Strugë.
/GazetaReforma.com/
