Prokuroria e Posaçme Kundër Krimit e Korrupsionit (SPAK) ka paralajmëruar ministren e Shëndetësisë dhe Mbrojtjes Sociale, Ogerta Manastirliu, nga e cila prej 10 ditësh nuk merr përgjigje lidhur me tenderat sekretë për të cilat SPAK ka nisur kryesisht hetimet.
Sipas Report Tv të premten ndaj ministres Manastirliu është nisur një kërkesë e dytë për informacion pasi në kërkesën e parë prej 10 ditësh ajo nuk i është përgjigjur.
Disa nga pyetjet që SPAK i ka drejtuar Manastirliut janë:
- Çfarë procedure është ndjekur në tenderat e zhvilluar?
- Çfarë klasifikimi sekret dhe çfarë niveli sekret kanë tenderat e zhvilluara nga ky institucion?
- Numrin e tenderave të zhvilluar me procedurë sekrete?
- Sa është vlera e tenderave me procedurë sekrete?
- Çfarë është blerë me këto tendera?
Sipas hetuesve, në rast se në fillim të kësaj jave nuk do të kenë një përgjigje nga Institucioni Shëndetësisë ku kanë dërguar dy shkresa radhazi me këto pyetje atëherë ata do zbarkojnë në këtë institucion për të bastisur zyrat dhe marrë dokumentet e kërkuara.
Sakaq, ditën e djeshme kryetari i PD-së, Lulzim Basha u shpreh se në ditët e fundit ka pasur një zjarr në katin e katërt te zyra e prokurimeve te Ministria e Shëndetësisë.
Sipas tij, zyrtarët e kësaj ministrie duke qenë se nuk ja kanë dalë për të manipuluar tenderat, tashmë që SPAK-u nisi hetimet u vendosën flakën dokumenteve, teksa i bëri një thirrje SPAK-ut, duke e cilësuar si provë për jetë a vdekje çështjen e tenderave sekretë.
Kujtojmë se PD ka çuar në SPAK edhe ministren e Mbrojtes, Olta Xhaçka, të cilën e akuzon për akuzime me tenderin e Ushqimit.
Prej më shumë se sa 2 javësh, SPAK ka nisur hetimet për tenderët sekret dhe më herët ka pyetur 6 anëtarët e Komisionit të Vlerësimit të ofertave.
