Janë arrestuar ditën e sotme dy autorët e vjedhjes me dhunë të mbrëmjes së 22 marsit në fshatin Greshicë në Mallakastër.
Policia bën me dije se janë arrestuar K.S, 21 vjeç dhe A.M, 22 vjeç, të dënuar më parë në Greqi për vjedhje me armë dhe banues në Panahor.
Ndërkohë është shpallur në kërkim bashkëpunëtori i tyre me inicialet H.M.
Ishin këta persona sipas Policisë të cilët mbrëmjen e 22 marsit hynë me forcë në banesën në Greshicë, kërcënuan me armë të ftohta familjarët brenda si dhe vodhën një sasi lekësh.
Njoftimi i policisë
Policia zbardh në kohë rekord ngjarjen e ndodhur mbrëmjen e datës 22 Mars në fshatin Greshicë të Mallakastrës ku u vodh me dhunë një banesë.
Ndalohen 2 autorët e dyshuar të vjedhjes me dhunë, shpallet në kërkim bashkëpuntori tjetër.
Specialistët për Hetimin e Krimeve në Komisariatin e Policisë Mallakastër, në bashkëpunim me Specialistët për Hetimin e Krimeve të Rënda në DVP Fier, pas marrjes së njofitmit se në një banesë në fshatin Greshicë kishin hyrë të maskuar 3 persona ku nën kërcënimin e armëve të ftohta kishin dhunuar familjarët dhe i kishin marrë një sasi lekësh, u ngrit grupi hetimor i cili bëri të mundur zbardhjen e ngjarjes dhe ndalimin në kohë rekord të autorëve të dyshuar.
Pas një pune hetimore të mirëorganizuar, u bë ndalimi i shtetasve:
K.S, 21 vjeç, banues në Panahor.
A.M, 22 vjeç, banues në Panahor (të dy të dënuar më parë për vjedhje me armë në Greqi.)
Gjithashtu u shpall në kërkim dhe po punohet për kapjen e bashkëpuntorit tjetër, shtetasit M.H.
Materialet proceduriale i kaluan Prokurorisë pranë Gjykatës së Shkallës së Parë Fier në ngarkim të këtyre tre shtetasve për veprën penale “Vjedhje me dhunë e kryer në bashkëpunim”.”
