Në datën 8 janar në autostradën Gjegjan-Reps në Pukë u gjet e djegur një mjet tip “Skoda Fabia”, e cila ishte marrë me qira në Rinas sipas hetimeve, nga një shtetas italian.
Asnjë informacion nuk u dha më tepër, ndërkohë që janë mediat italiane ato që kanë ngritur alarmin për zhdukjen e ish-gjykatësit italian, Davide Pecorelli, pasi mjeti që u gjet i djegur në Pukë, ishte marrë me qera pikërisht nga ai.
Sipas këtyre mediave, italiani 45 vjeçar u largua nga Italia në ditët e para të vitit dhe zbriti në aeroportin e Tiranës, por që prej asaj dite ai është zhdukur pa lënë asnjë gjurmë.
Prej disa kohësh Pecorelli kishte zgjeruar tregun e dyqaneve të tij në Itali, duke hapur aktivitete edhe në Shqipëri.
Kërkimet për të kanë filluar, ndërkohë që objektet që i përkisnin atij në automjetin e djegur janë dërguar për ekspertizë, për të parë nëse ai ka patur pasoja nga zjarri në makinë apo e ka vendosur qëllimisht për të humbur gjurmët.
Lidhja e Pecorellit me Shqipërinë ka nisur edhe për shkak të partneres së tij, që është me origjinë shqiptare, me të cilën ka edhe një fëmijë.
Kjo duket se e ka lidhur atë më shumë me Shqipërinë. Ai kishte mbërritur në Shqipëri më 7 janar.
Më pas udhëtoi me një automjet tip “Skoda” të marrë me qira. Kaq dihet zyrtarisht për itenerarin e tij, ndërsa pas gjetjes së automjetit të marrë me qera nga ai të djegur, vendndodhja dhe fati i tij mbeten ende mister.
Autoritetet shqiptare ende nuk kanë të dhëna të plota për shtetasin italian Davide Pekorelin, ndërsa ngjarja po vazhdon të hetohet./Gazetareforma.com/
