Kryebashkiaku Erion Veliaj u arrestua më 10 shkurt, pas një vendimi të Gjykatës së Posaçme të Shkallës së Parë, e cila ka vendosur disa masa sigurie për të, përfshirë edhe për bashkëshorten e tij, Ajola Xoxa.
Sipas hetimeve të SPAK, Xoxa akuzohet për disa vepra penale, duke përfshirë “Korrupsionin pasiv të funksionarëve të lartë shtetërorë”, “Pastrimin e produkteve të veprës penale” dhe “Deklarimin e rremë të pasurive”.
Gjykata ka konstatuar se ekzistojnë prova që sugjerojnë se Ajola Xoxa nuk ka deklaruar pasuritë dhe të ardhurat e krijuara nga angazhimet e saj, përfshirë pjesëmarrjen në bordin e Qendrës “Harabel” dhe si pronare e shoqërisë “Nan Gallery” shpk, një subjekt fitimprurës.
Hetimet kanë zbuluar se mungesa e transparencës për këto aktivitete ka lejuar lëvizjen e fondeve në mënyrë të dyshimtë, duke penguar hetimet për burimin dhe destinacionin e parave.
Për më tepër, Ajola Xoxa ka fshehur detaje të tjera, si qiranë e një prone prej 24,000 euro në vit, dhe shpenzimet luksoze të saj dhe të afërmve të saj, që arritën në 86 milionë lekë për katër vjet, vetëm për rroba, kozmetikë dhe aksesorë.
Ky nivel shpenzimesh tregon një stil jetese të luksit të shfrenuar, me prova të kësaj në fotografi që tregonin se ajo kishte blerë një varëse rubini dhe diamantesh me vlerë 14,800 dollarë.
