Ditën e djeshme Florenc Çapja dhe Suel Çela u liruan nga burgu.
Çapja akuzohej për vrasjen me paramendim të mbetur në tentativë të ish-efektivit të policisë, Fadil Mema.
Gjyqtari Tomor Kullolli ka vendosur ta lirojë nga burgu me pretendimin, se nuk provohet që e ka bërë ai krimin.
Edhe pse Gjykata e Shkallës së Parë Elbasan dhe Apeli i Durrësit hodhën poshtë kërkesën e tij për lirim.
Policia ka dënuar ashpër këtë vendim, duke thënë se Çapja është një person me rrezikshmëri të lartë, por që arriti të lirohej falë vendimeve arbitrare dhe të paligjshme.
Po ditën e djeshme, Krimet e Rënda liruan Suel Çelën, i cili akuzohet për goditjen e makinës së policisë në tregun e Elbasanit.
Më 4 nëntor Prokuroria në konkluzionet përfundimtare, bëri ndryshimin e akuzës në “Kundërshtim të punonjësit të rendit publik”, që dënohet me 7 vite burg, ndërsa Gjykata e shpalli të pafajshëm.
Edhe Çelën, policia e quan person me rrezikshmëri të lartë shoqërore, i hetuar disa herë për vepra të ndryshme penale.
Sipas policisë, nëpërmjet formave korruptive, Çela i ka shpëtuar drejtësisë.
Policia e Shtetit shpreh zhgënjimin e thellë për këto dy vendime, pasi në bashkëpunim me partnerët ndërkombëtarë, kanë bërë punë shumë të madhe.
Këto vendime sipas policisë, i japin krahë krimit.
