Giovanni Brusca, një nga figurat më të njohura dhe të urryera të mafies italiane, i njohur për rolin e tij në vrasjen e prokurorit legjendar të anti-mafias Giovanni Falcone në 1992, është liruar plotësisht pas një periudhe katërvjeçare lirie me kusht, pas dënimit prej 25 vitesh burg.
Brusca, tani 68 vjeç, ishte anëtar i rëndësishëm i Cosa Nostra-s dhe krahu i djathtë i Salvatore “Toto” Riina, bosit të famshëm të mafies.
I njohur me nofkën “kasapi i Cosa Nostra-s”, ai ka pranuar përfshirjen në më shumë se 100 vrasje, duke përfshirë edhe ato më brutale në historinë e mafies italiane.
Më 23 maj 1992, ai shpërtheu një bombë me telekomandë pranë Capacit, duke vrarë Giovanni Falconen, gruan e tij Francesca Morvillo dhe tre truproja. Ky atentat konsiderohet një nga ngjarjet më të dhimbshme në historinë moderne të Italisë.
Ai është gjithashtu përgjegjës për rrëmbimin dhe vrasjen makabre të 11-vjeçarit Giuseppe Di Matteo, i cili u mbajt peng për muaj të tërë dhe më pas u mbyt me litar dhe trupi iu shkatërrua me acid si hakmarrje ndaj babait të tij, një ish-mafioz i penduar.
Pas arrestimit në maj 1996, Brusca nisi të bashkëpunonte me drejtësinë, duke u bërë një nga dëshmitarët më të rëndësishëm në luftën kundër mafies. Bashkëpunimi i tij solli dënime të rëndësishme dhe çoi në shkatërrimin e shumë rrjeteve kriminale. Falë kësaj bashkëpunimi, ai përfitoi ulje dënimi dhe u lirua me kusht në vitin 2021, ndërsa më 1 qershor 2025 fitoi lirinë e plotë.
Lirimi i tij ka ngjallur indinjatë të madhe tek familjarët e viktimave, të cilët refuzojnë të pranojnë që njeriu përgjegjës për kaq shumë krime të jetë sot i lirë.
Tina Montinaro, e veja e njërit prej truprojeve të vrarë në atentat, tha: “Është e dhimbshme të dish se një njeri përgjegjës për kaq shumë vdekje është jashtë burgut. Bashkëpunimi me drejtësinë nuk fshin krimet e kryera.”
Megjithëse lirimi është i plotë, Brusca do të jetojë larg Siçilisë, me identitet të ndryshuar dhe nën mbrojtje, për shkak të rrezikut të lartë nga hakmarrja e mafias që ai ka denoncuar.
