Në fillim të vitit të kaluar, 2019, një mega aksion do mbyllte lojërat e fatit në vendin tonë, teksa e vetmja kazino e licensuar në kryeqytet është “Regency Casino”, ose siç njihet ndryshe “Kazinoja e Tajvanit”.
Kjo kazino ka ngelur hapur falë një license 15-vjeçare të marrë më 29 prill 2005, e cila skadon më 28 qershor 2020, e në çdo rast “Regency Casino”, nuk mund të vazhdojë më të ushtrojë aktivitetin brenda në kryeqytet.
Bazuar në ligjin e miratuar më 2018 në Kuvend, hapja e një kazinoje mund të bëhet vetëm në hotele me 5 yje, të njohura ndërkombëtarisht si “brand name”, dhe si resort kazino jashtë zonave urbane.
Dosja.al ka marrë informacion, se janë disa hotele në kryeqytet, disa prej tyre me 5 yje, e të tjera në tentativë për të krijuar 5 yje, që kanë nisur interesimin për të hapur kazino në ambientet e tyre dhe mbyllja e Tajvanit, do të favorizonte këtë biznes, që më shumë se kurrë duket se ka dëshirë të lulëzojë në Shqipëri.
Më herët ditën e sotme, Partia Demokratike akuzoi vëllain e ministres së Shëndetësisë, Ogerta Manastirliu, Alban Manastirliun se po fshihet pas licensimit më 19 maj 2020 të kompanisë “Adria Entertainent“, përmes bashkimit të disa kompanive për të vijuar aktivitetin e lojërave të fatit.
Për 10 vite, bashkimi i kompanive përfshirë edhe ish-Apexin, do të ketë një licensë për të punuar me kazinotë elektronike, ndërkohë që me mbylljen e Regency, të tjerë lojtarë mund të dalin në lojë.
