Një tërmet ka lëkundur ditën e sotme Shqipërinë. Tërmeti ishte me magnitudë 4.4 të shkallës Rihter me epiqendër në Shetaj të Gjirit të Lalzit, afër detit Adriatik.
Deri më tani nuk raportohet për dëme materiale apo në njerëz. Zona ku ka rënë tërmeti nuk është e panjohur për lëkundjet sizmike, pasi ajo ishte ndër më të prekurat në 2019 kur Shqipëria u godit nga tërmeti i fuqishëm 6.4 i shkallës Rihter që la pas 51 viktima dhe mijëra të pastrehë.
Megjithatë , sizmologët kanë siguruar se nuk do të ketë më tërmet të fuqishvm në këtë zonë .
Tërmeti i fuqishëm i 26 nëntorit, që shkaktoi 51 viktima dhe dëme të pallogaritshme në Shqipëri, konsiderohet si i pazakontë nga profesori grek, Efthymios Lekkas. Sipas tij, me lëkundjen e 21 shtatorit u mendua se toka kishte gjetur qetësi, por thekson se gjasat për një tërmet të tretë të fuqishëm janë shumë të pakta, pasi energjia e çliruar nga paslëkundjet ka qenë normale. Sipas tij, një tërmet tjetër aty ku ra në 26 nëntor tashmë mund të pritet vetëm pas 300 vitesh.
Efthymios Lekkas, kryetar i Organizimit të Planifikimit dhe Mbrojtjes Antisizmike, profesor i Gjeologjisë së Aplikuar Dinamiko-Tektonike & Menaxhimit të Fatkeqësive, Athinë, është shprehur se “pas tërmetit të parë dhe të dytë, energjia sizmike është çliruar në një masë shumë të madhe. Duke parë se lëkundjet passizmike po zhvillohen në mënyrë normale, kjo na çon në gjykimin se do t’i shpëtojmë një tërmeti të tretë të fortë”. /Gazetareforma.com/
