Prokuroria e Hagës ka sqaruar zyrtarisht se në përkthimin në shqip të fjalës së prokurores speciale ka pasur një gabim, i cili ka krijuar keqkuptim mbi kërkesën për dënim ndaj ish-krerëve të UÇK-së.
Gabimi lidhej me mënyrën si u interpretua shifra e dënimit. Në publik u krijua përshtypja se Prokuroria kishte kërkuar 45 vite burg në total për të katër të akuzuarit së bashku. Ky interpretim nuk është i saktë.
Sipas sqarimit të Prokurorisë, kërkesa është që secili nga të akuzuarit të dënohet individualisht me nga 45 vite burg. Kjo do të thotë se:
45 vite burg janë kërkuar për Hashim Thaçin
45 vite burg për Kadri Veselin
45 vite burg për Jakup Krasniqin
45 vite burg për Rexhep Selimin
Në total, kërkesa për dënim arrin në 180 vite burg, por kjo është thjesht shuma e dënimeve individuale dhe jo një dënim i përbashkët apo kolektiv.
Prokurorja Kimberly West theksoi në sallën e gjyqit se Prokuroria nuk po kërkon dënim për Shtabin e Përgjithshëm të UÇK-së dhe as për vetë UÇK-në. Ajo sqaroi se dënimi kërkohet vetëm për persona konkretë dhe vetëm mbi bazën e përgjegjësisë së tyre individuale.
“Kërkojmë aktgjykim dënues për të gjitha pikat e aktakuzës me dënim unik prej 45 vjetësh për secilin nga të akuzuarit, duke u mbështetur në kontributet individuale të krimeve të kryera. Këto janë krime lufte dhe krime kundër njerëzimit dhe mbeten shumë të rënda edhe sot”, u shpreh prokurorja.
Ajo shtoi se Prokuroria nuk kërkon dhe nuk mund të ketë dënim vetëm mbi bazën e anëtarësisë në UÇK apo në Shtabin e Përgjithshëm, por vetëm mbi prova konkrete dhe përgjegjësi personale.
Gjatë momentit kur u lexua kërkesa për dënim, kamerat filmuan reagimet e të akuzuarve. Fillimisht u panë Jakup Krasniqi dhe Kadri Veseli, e më pas Hashim Thaçi dhe Rexhep Selimi, të cilët shfaqeshin me fytyra të vrenjtura.
The Kosovo Specialist Prosecutor’s Office at the Hague is seeking 45 years in prison for each defendant—Hashim Thaçi, Kadri Veseli, Jakup Krasniqi, and Rexhep Selimi.
This amounts to a total request of 180 years for former KLA members. pic.twitter.com/mSwyDwVbdw
— RTK – Radio and Television of Kosovo (@rtklivecom) February 9, 2026
Ish-krerët e UÇK-së akuzohen për ndërmarrje të përbashkët kriminale lidhur me krime lufte dhe krime kundër njerëzimit. Sipas aktakuzës së publikuar nga Zyra e Prokurorit të Specializuar në shkurt 2023, ata akuzohen për rreth 100 vrasje, si dhe për tortura dhe trajtim mizor në rreth 40 qendra ndalimi gjatë viteve 1998 dhe 1999.
