Kuvendi mblidhet sot në seancën plenare, ku në rendin e ditës janë dy akte normative të Këshillit të Ministrave, që synojnë zgjatjen e vlefshmërisë së dokumenteve të identifikimit për shqiptarët që jetojnë jashtë vendit deri në fund të majit 2025.
Propozimi parashikon që afati i vlefshmërisë për letërnjoftimet elektronike dhe pasaportat e skaduara të shtetasve shqiptarë me banim jashtë Shqipërisë të shtyhet për të garantuar të drejtën e votës në zgjedhjet parlamentare të 11 majit.
Kjo masë do t’u japë mundësi emigrantëve të regjistrohen në platformën PER deri më 4 mars dhe të votojnë me postë.
Po ashtu, Kuvendi do të diskutojë edhe një projektvendim për shtimin e 80 punonjësve me kohë të pjesshme në Komisionin Qendror të Zgjedhjeve, për të përballuar fluksin e aplikimeve të shqiptarëve nga jashtë.
Punonjësit, të ndarë në specialistë dhe operatorë, do të ndihmojnë në përgatitjen dhe shpërndarjen e dokumentacionit zgjedhor, si dhe në administrimin e votave të mbërritura me postë deri në nisjen e procesit të numërimit.
Gjithashtu, në seancën e sotme pritet të shqyrtohet projektvendimi për zgjedhjen e Komisionerit për Mbrojtjen nga Diskriminimi.
