Policia greke ka dhënë një deklaratë zyrtare për arrestimin e dy shtetasve shqiptarë, të dyshuar si vrasës me pagesë, në lidhje me një ngjarje të rëndë kriminale në Athinë.
Jenis Tulja, 44 vjeç, nga Tirana, dhe Mirjan Guveli, 45 vjeç, nga Saranda, u arrestuan pas një operacioni të policisë në lagjet “Peristeri” dhe “Nea Smyrni”.
Ata akuzohen për vrasjen e 47-vjeçarit Irakli Davella dhe plagosjen e 46-vjeçarit Edi Lulo (alias Edmond Hysa) më 15 dhjetor 2024, si dhe për përfshirje në një sërë veprash penale, duke përfshirë “organizatë kriminale”, “vrasje”, “armëmbajtje pa leje”, “falsifikim” dhe “mbajtje lëndësh narkotike”.
Sipas hetimeve, dy të dyshuarit u afruan pranë tre personave në këmbë dhe hapën zjarr ndaj tyre, duke shkaktuar vdekjen e Davellës dhe plagosjen e dy të tjerëve. Pas kryerjes së krimit, ata u larguan me automjet.
Gjatë kontrolleve në banesat e të dyshuarve, policia greke sekuestroi dy armë “Kallashnikov”, një armë “Scorpions”, jelekë antiplumb, silenciatorë, fishekë dhe një sasi parash.
Materialet procedurale janë dorëzuar autoriteteve greke për hetime të mëtejshme mbi aktivitetet kriminale të dyshuarve.
