Lëvizja Vetëvendosje ka rikonfirmuar kryetarin e saj, Albin Kurtin, njëherësh kryeministër në detyrë i Kosovës, si kandidat për një tjetër mandat në krye të qeverisë. Vendimi u mor me votë unanime në mbledhjen e 59-të të Këshillit të Përgjithshëm të partisë, të mbajtur të dielën.
LVV fitoi më së shumti mandate në zgjedhjet e 9 shkurtit, duke siguruar 48 ulëse në Kuvend, numër i pamjaftueshëm për të formuar vetë qeverinë. Në fjalimin e tij, Kurti falënderoi anëtarët e partisë për besimin dhe prezantoi programin e qeverisjes së re, ku veçoi si synime kryesore anëtarësimin e Kosovës në Bashkimin Evropian dhe NATO.
Ky vendim vjen pak ditë pasi Gjykata Kushtetuese vendosi një masë të përkohshme që ndalon zhvillimin e procedurave për formimin e qeverisë së re deri më 30 shtator. Masa është kritikuar nga Vetëvendosje, e cila e konsideron pengesë të panevojshme.
Nënkryetari i LVV-së, Glauk Konjufca, akuzoi partitë e tjera shqiptare për krijimin e krizës institucionale, duke thënë se që prej certifikimit të zgjedhjeve janë bërë përpjekje për të mos pranuar rezultatin elektoral.
Vendimi i Kushtetueses erdhi pas kërkesës së Listës Serbe, partia më e madhe e komunitetit serb në Kosovë, e mbështetur nga Beogradi. Ajo kundërshtoi mënyrën se si kryetari i Kuvendit, Dimal Basha, hodhi në votim kandidaturat për nënkryetarët nga komunitetet joserbe dhe serbe. Pas disa raundeve të dështuara votimi, Basha shpalli Kuvendin të konstituuar, megjithëse nuk ishte zgjedhur nënkryetari i pestë, duke nxitur mosmarrëveshje ligjore.
Kurti e quajti masën e Kushtetueses “edhe absurde, edhe të dëmshme”, duke akuzuar gjykatën për vonesa që sipas tij bllokojnë reformat dhe dëmtojnë demokracinë.
Nga ana tjetër, njohësi i çështjeve ligjore, Vullnet Bugaqku nga Instituti Demokratik i Kosovës, e vlerësoi vendimin si të drejtë dhe të domosdoshëm për të parandaluar pasoja juridike.
Sipas procedurave, pas konstituimit të plotë të Kuvendit, presidentja e Kosovës duhet të mandatojë partinë fituese për formimin e qeverisë. Mandatari ka 15 ditë për të paraqitur kabinetin dhe duhet të sigurojë votat e 61 deputetëve. Nëse qeveria nuk formohet brenda 40 ditësh, presidentja shpall zgjedhje të reja, të cilat mbahen 40 ditë pas dekretit.
