Kryeministri i Kosovës, Albin Kurti ka dhënë detaje të tjera në lidhje me sulmin terrorist të 24 shtatorit në Banjskë të Zveçanit. Sipas Kurtit sulmi i realizuar në Banjskë ishte vetëm një copëz nga sulmet që ishin përgatitur që kishin si synim për të aneksuar veriun e Kosovës. Kurti bëri me dije se plani për aneksimin e veriut do bëhej përmes një sulmi të koordinuar nga 37 pozicione të ndryshme.
Kurti shton se kjo do të pasonte me krijimin e një korridori për në Serbi, i cili do ta mundësonte furnizimin me armë dhe trupa.
“Bazuar në dokumentacionin e konfiskuar, Policia e Kosovës ka konfirmuar se sulmi terrorist ishte pjesë e një plani më të madh për të aneksuar veriun e Kosovës përmes një sulmi të koordinuar nga 37 pozicione të ndryshme. Do të pasonte krijimi i një korridori për në Serbi, për të mundësuar furnizimin me armë dhe trupa”, ka shkruar Kurti.
